මගේ කවිය

නද දී උදේ     ඔරලෝසුවේ  වදී  හත 

මැද ඇති snooze බොත්තම වෙත ඇදෙයි  අත 

ඇඳ මත වැතිර නිදියන්නට ඇතත්    හිත 

අද වැඩ දිනකි ඇහැරී යා යුතුව     ඇත

පොඩි පුතු තවම නිදියයි  දකිමින් හීන 

සොලවා ඇහැරුවත් නිදි ගතියකි පේන 

හරවා කරාමය  කාමරයේ නාන 

ඇහැරා ගනිමි සෝදා ඔහුගේ මුණ 

දුවණිය මගේ මේ අතරේ අවදි වෙලා 

TV බලන්නද අහනව  සිනහ සලා 

මොන TVද දැන් හොඳටම දවල් වෙලා 

කිව්වම ඇගේ මුව ඇද වෙයි කඳුළු ගලා 

අත් දිග , කකුල් දිග කලිසම් කොට කමිස 

තෝරා  සුදුසු ඇඳුමක් හැටියට දවස 

අන්දා ළමුන්  සහ  සැරසී  වී වෙහෙස 

සැමදා උදෙන් අපි හැර යන්නෙමු නිවස 

ගන්නට ළමුන් ආපසු හවසට භාර 

පැමිණිය යුතුය වෙන්නට පෙර පහ මාර 

යන්නට උදෙන් කන්තෝරුව වෙත සාර 

මා ප්‍රිය බිරිඳ පදවයි රිය වෙත පාර 

කන තුරු මගේ දුවණිය උදයට කෑම 

ඇරලමු  පුතා nurseryයට  හැමදාම 

ආපසු ඇවිත් දුව පාසල් ගෙනයාම 

කල පසු කරමි වැඩ පොළ වෙත දිව යෑම 

meeting , call සහ නෙක වැඩ අතර සිට 

හෙම්බත් වෙලා ආපසු ගෙට පැමිණි විට 

දැක්කම බිරිඳ සහ දරුන'ගෙ සිනහ කට 

ලෝකය හරිම ලස්සනයැයි හිතෙයි  මට 

අපේ ස්ටෑන්ඩර්ඩ්

අපේ ස්ටෑන්ඩර්ඩ් 

පොඩි කාලේ අපේ ගෙදර රූපවාහිනී යන්ත්‍රය සහ කැසට් රේඩියෝව තිබුනේ සාලයේ ලී වලින් සැදූ කුඩා TV රදවනයකය. රූපවාහිනිය උඩය .රේඩියෝව පහලය. තරමක පරණ නිවසක් නිසාදෝ සාලයේ  වුයේ එක්  විදුලි පෙනුවක් (ප්ලග් සොකට් ) පමණි .
 රූපවාහිනීයෙත් රේඩියෝවෙත් තිබුනේ කූරු දෙකක් සහිත ප්ලග් එකකි (ටයිප් සී). බිත්තියේ තිබෙන්නේ ලංකාවේ බහුල ඇම්පියර් පහේ  රවුම් පින් තුනක් සහිත (ටයිප් ඩී )එකකි. සැමවිටම රූපවාහිනිය හෝ රේඩියෝව දමන්නට අවශ්‍ය විට බිත්තියේ ප්ලග් එකේ අර්ත් සිදුරට බෝල් පොයින්ට් පෑනක් ගැසිය යුතුය. ඒ සදහාම ලියන්නට නොහැකි ඉවරවුණු පෑනක් TV රාක්කය මතම තබා තිබුණි.
මෙහි "තීන්ත ඉවරවුණු" යන්න  විශේෂයෙන් සදහන් කලේ  මෙය විශේෂ උපකරණයක් වශයෙන් භාවිත වුනුබව අවධාරණය කරනු පිණිසය.

ශීතකරණය තිබුණේ කෑම කන කාමර අසලය. ශීතකරණයට සහ බිත්තියට පින් තුනක් සහිත ප්ලග්/සොකට් තිබුණු නිසා පහසුය. එත් මේ පේනුව ඇදුම් මදින ඉස්ත්රික්කය (අයන් ) සදහාද යොදා ගැනුනි. අපගේ ඉස්තිරික්කයට තිබුනේ විසුළු හැඩයක් ඇති චීන/ඔස්ට්‍රලියානු ප්‍රමිතියේ (ටයිප් අයි ) ප්ලග් එකකි.
ඒ සදහා "මල්ටි ප්ලග් " කියා හඳුන්වන කෝකටත් සවිකලහැකි කුඩා පෙට්ටියක් බිත්තියේ පේනුවට සවිකලවිට ,මුළු විශ්වයේම ඇති සොකට් වර්ග විදුලියට සම්බන්ධ කර ගත හැකිය.මල්ටි ප්ලග් වල උඩ සහ යටද පින් දෙකේ පේනු ඇතිනිසා තවත් පහසුය . එකම කරදරය නම් තත්වයෙන් බාල මල්ටි ප්ලග් වල උඩ  හා යට ඇති පේනු  නිසා ඒවා ඇල්ලීමේදී කරන්ට් වදින්නට ඇති හැකියාවය. මම නම් ඒ පාඩම කිහිපවරක්ම අත්දැකීමෙන්ම ඉගෙන ගත්තෙමි.

කුස්සියේද වැඩියමක් නොතිබුනත් , හතරැස් පින් තුනක් සහිත ඇම්පියර් දහතුනේ බ්‍රිටිෂ් ස්ටෑන්ඩර්ඩ් සොකට් සහිත  බ්ලෙන්ඩරයක් තිබුණි.එයද භාවිතා කලේ මල්ටි ප්ලග් එකකින්  ඇම්පියර් පහේ රවුම් පින් පෙනුවකට සවි කිරීමෙනි. බ්ලෙන්ඩර පාවිච්චි කරනවිට ඉඳහිට ෆියුස් (fuse )යන බව අම්මා කියනවා මට මතකය.

කුඩාකල සිටම මේවා දැක තිබුණු බැවින් එහි කිසි අමුත්තක් මට දැනුනේ නැත. ඒවා අපිට "වේ ඔෆ් ලයිෆ්ය "

කෙසේ වෙතත් මේවා මෙසේ වන්නේ ස්ටෑන්ඩර්ඩ් වල හුටපටයක් නිසා මට තේරෙන විට මා සිටියේ විශ්වවිද්‍යාලයේ දෙවන වසරේය. ඒත් ඉලෙක්ට්‍රිකල් ඉංජිනියරින් පොතක් ලයිබ්‍රරියේදී කියවන විටය.ජාත්‍යන්තර වශයෙන් හාවිතා වන පේනු  සහ සොකට් වල පින්තුරද එහි විය. මල්ටි ප්ලග්, එක්ටෙන්ෂන් කේබල් සහ පෑන් උවමනා කරන්නේ වැරදි පේනු  සහ සොකට් හාවිතය නිසාය. අනෙක් අතට ප්ලග් එක ගැසීමට පෑනක් උවමනානම් ප්ලාස්ටික් කූරක් විදුලිපේනු සමග විකිනියයුතුය යන්න මට සිතුනේත් නැත.

එයිනුත් වසර ගණනකට පසුව මට මෙය ලියන්නට සිතුනේ , පසුගිය සතියේ සිට හතරැස් පින් තුනක් සහිත ඇම්පියර් දහතුනේ බ්‍රිටිෂ් ස්ටෑන්ඩර්ඩ් සොකට්ලංකාවේ ස්ටෑන්ඩර්ඩ් එක ලෙසම පිළිගන්නට ලංකාව ආරම්හ කිරීමය. එයට සමගාමීව ලංකාවට ගෙන්වන විදුලි උපකරණද  හතරැස් පින් තුනක් සහිතව   ප්‍රමතිකරනය  කරන බව කියවේ. ඉතා ප්‍රමාදව වුවත් මෙයනම් ඉතා හොඳ දෙයකි. නමුත් එහි ප්‍රතිපල ලැබීමට තවත් අවුරුදු දහයක් වත් ගතවෙනු ඇත.

සොකට් පිලිබදව ලංකාවේදීම දැනගත්තත්  ඩ්‍රයිවින් ගැන ඉගෙන ගන්නට නම් මට ලංකාවෙන් පිටතට එන්නටම සිදු විය.
ඇමරිකාවෙත් , යුරෝපයේත් වාහන එලවන්නේ පාරේ දකුණෙනි.එංගලන්තයේ වමෙනි. ලංකාවෙත් එසේම උනත් පාරේ යනවිට  මිනිස්සු  වමෙනුත් , දකුණෙනුත් , මැදිනුත් වාහන එලවති .විදුලි පෙණු ප්‍රමිතිගත කල විදිහටම ඉතා ඉක්මනින්ම ඩ්‍රයිවින් ප්‍රමිතිගත කලයුතුය.

තවමත් අප ලංකාවේ වාහන එලවන්නේ මල්ටි ප්ලග්, එක්ටෙන්ෂන් කේබල් සහ පෑන් භාවිතා කරමිනි.

අපේ හැටි හෙවත් සංස්කෘතිය

 මීට මාස අටකට පමණ පෙර මම පිළියන්දල නගරයේ නිමි ඇඳුම් සාප්පුවක මුදල් ගෙවන කවුන්ටරය අසල මගේ වාරය එනතුරු බලා සිටියෙමි.

පෝලිමේ මට ඉදිරියෙන් එක්  අයකු සිටි අතර පසුපසින් තවත් දෙදෙනක් වුහ. කවුන්ටරය අසල මාසිටි ස්ථානයේ කුඩා සෙල්ලම්බඩු හා විසිතුරු භාණ්ඩ තබා තිබුණි.

වේලාව  පස්වරු තුනට පමණ වූ අතර පාසල් ගුරුවරියක් යයි සිතියහැකි සාරියකින් සැරසුණු මැදිවයස ඉක්මවූ කාන්තාවක් ඇඳුම් කීපයක් රැගෙන මා  සිටි තැනට පැමිණ විසිතුරු භාණ්ඩ පරික්ෂා කරන පරිද්දෙන් මදවේලාවක්  ඒ දෙස බලා සිට එක්වරම මා ඉදිරියෙන් පෝලිම පැන , ඒ වනවිටත් පළමු පාරිභෝගිකයාට සේවා සපයමින් සිටි අයකැමිවරයාට තමා  රැගෙන ආ ඇඳුම් ටික දෙන්නට උත්සාහ කලාය .

ඇගේ  ක්‍රියාව ගැන මට ඇතිවුයේ  කෝපයකට වඩා , කනගාටුවකි . ඒ ඇය  සම්භන්ධයෙන් නොව ඇයගෙන් ඉගෙනගන්නවා ඇතැයි මා සිතූ සිසු සිසුවියන් ගැනය.

මේ පෝලිම් පැනීමේ කලාව  ආසියාතිකයන්ට සංස්කෘතියෙන්ම හිමිවුවක්  යයි මම සිතමි.

එක : 

ඔබ රජයේ රෝහලක වෛද්‍යවරයෙකි. හොඳම මිතුරෙකු ඔබට දුරකථන ඇමතුමක් දී කියන්නේ හදිසියේ අසනීපවූ  මිතුරාගේ මව රෝහලට ඇතුලත් කල බවයි. 

ඔබ උසස් පෙළ සඳහා මිතුරා  සමග පාඩම් කරද්දී කෑම බීම සපයා  ඔබේ මව මෙන් ඔබට සැලකුයේ ඇයයි.  මිතුරාගේ මව බැලීම පිණිස ඔබ වහාම යනයන අතර රෝගියාගේ වෛද්‍ය ලියවිලි පරීක්ෂා කල පසු ඔබට වැටහෙන්නේ ඇයට  ක්ලාන්ත තත්වයක් ඇතිවී  ඇති නමුත් කිසිම අසනීපයක් නොමැති බවයි.කෙසේ උවත් වැඩි දුර පරීක්ෂාව සඳහා මිතුරාගේ  මව රෝහලේ රඳවාගෙන ඔබට කළහැකි සියලුම ඇප උපස්ථාන කිරීමට  ඔබට කටයුතු කරයි.

මේ අතරම රෝහලේ  ඇඳන්  නොමැති කමින්  තමන්ට ඇඳක් ලැබෙනතුරු සිමෙන්ති  පොළොවේ සති ගණන් සිටින අසාද්‍ය සහ අහිංසක රෝගීහුද  සිතිති.

දෙක :

ඔබ සේවය කරන්නේ විශ්‍රාම වැටුප් දෙපාර්තුමේන්තුවේය. රාජකාරි කරන කන්තෝරුවේ  වීදුරු දොරින් ඔබට පෙනෙන්නේ තම විශ්‍රාම වැටුප සාදා  ගැනීමට පැමිණි විශ්‍රාම ලත් රජයේ සේවක පිරිසය.පෝලිමේ පිටිපසින්ම  සිටින්නා තරමක් දැක පුරුදු යයි ඔබට හැඟේ.

විදුලියක් මෙන් නැගී සිටින ඔබ වහා  එහි යයි. මේ  "සෝමරත්න  සර්  නේද ? " ඔබ විමසයි.  සෝමරත්න  සර්ගේ  මුහුණ ආලෝකමත් වෙයි.

මේ ඔබ පාසල් යනකාලයේදී ඔබට ඉගැන්වූ ඔබේ ප්‍රියතම ගුරුවරයාය. මගේ පැන්සන් එක හදා  ගන්න ආවා  ඔහු පවසයි.

ගුරුවරයා කාර්යාලය තුලටම  කැඳවාගෙන යන ඔබ ඔහුගේ  කටයුත්ත වහා  ඉටු කරදෙයි.

මහත් සතුටට පත්වන ඔබගේ පැරණි ගුරුවරයා ගෙදර ගොස් පවසන්නේ "මගේ ගොලයෙක්ව හම්බවෙච්ච නිසා වැඩේ එක දවසෙන්ම කරගත්තා " කියා යි.නමුත් බොහෝ විශ්‍රාමිකයන් මාස  ගණනාවක් තිස්සේ හත් අට වරක්ම විශ්‍රාම වැටුප් දෙපාර්තුමේන්තුවේ රස්තියාදු වන්නේ මේ කාර්යය සඳහාමය.

තුන :

හදිසි රාජකාරි කටයුත්තකට විදේශ ගතවීමට ඔබට සිදුවේ. ගමන් බලපත්‍රය පරීක්ෂා කලවිට ඔබට පෙනී යන්නේ එය මාස දෙකකින් කල් ඉකුත්වන බවයි.ඉක්මනින්ම වීසා අයදුම් කලයුතු  නිසා ගමන් බලපත්‍රය අලුත් කරගත යුතුය. ඔබ වහාම ආගමන විගමන දෙපාර්තුමේන්තුවේ මිතුරෙකු හමුවන අතර මිනිත්තු පහකින් පමණ එය ඉටුකරදීමට ඔබේ මිතුරා සමත්වේ.

මේ අතරම ගෘහ සේවිකා රැකියාවකට යාමට බලපත්‍රය අලුත් කරගැනීමට පැමිණි කෙනෙකුන් පැය ගණනක් ඒ සඳහා බලා  සිටී.

දෙමවුපියන්ට, ගුරුවරුන්ට හා නෑ හිතමිතුරන්ට සැලකීම  අපේ සංස්කෘතියේ මුලික හරයන්ය.ඒ නිසා ඉහත සිද්ධි තුනේදීම ඔබ කරන්නේ ඉතාම සත්පුරුෂ  ක්‍රියාවන් ලෙස බොහෝ දෙනෙකුට පෙනෙනු ඇත . අනෙක් අතට මිතුරන් සමග නම් අන්‍යෝන්‍ය උපකාරද  කරගත හැක. 

කාර්යාල සහායකයන්  ආදී පහළ  ශ්‍රේණි වල සේවකයන්ට මේ අන්‍යෝන්‍ය  උපකාර කිරීමේ වාසිය පමණක් නොසැහේ. ඒ නිසාම ඔවුන් මිනිසුන්ගෙන් මුදල් (පගාව) ගෙන ඒ සඳහා කරණ ප්‍රති උපකාරකයක් වශයෙන් අවශ්‍යතාවන් කඩිනමින් කරදෙනු ලැබේ.

අප හැමටම අපේ කාලය අගනේය. ඒ නිසා දන්නා හඳුනන පුද්ගලයන් ලවා වැඩ ඉක්මනින් කරවා  ගන්නට අපි  වෙහෙසවෙමු. පෝලිම පැන වැඩකර ගත්තොත් එය සමාජ සාධාරණයට පටහැණි  නිසා කොතරම් රස්තියාදු උනත් මම නම් එය නොකරමි'යි කියාගන්නා  කිසිවෙකුත් මා දැක නැත .

අනෙක් අතට මිතුරෙක් හෝ අසල්වැසියෙක් ඔබෙන් එවැනි උදව්වක් ඉල්ලු විට , අනෙක් අය මෙන් පෝලිමේ පැමිණ එය කරගන්නට නොහැකි ඇයි දැයි 

ඇසුවොත් ඔබ ගුටිකනු  නොඅනුමානය.

ඔබට  හිතවත් පොලිස් නිලධාරීන් ,අධිකරණ විනිසුරුවන් ආදීන් සිටීනම් නීතියේ රාමුව තුල ඔබට වාසි සහගත උපකාර ලබාදීමට ඔවුන් පසුබට නොවනු ඇත. මේවා අන්‍යොන්‍ය  උපකාර වශයෙන්  හෝ  මුදලට කරන උපකාර විය හැක 

 මුදල්ද , හිතවතුන්ද නොමැති උන්ට සමාජ අසාධාරණය ලෙස පෙනුනත් මේවා අපගේ සංස්කෘතික අංගයන්ය. සමාජ සාධාරණය පතන්නෝ මුලින්ම හිත මිතුරන්ගෙන්  රාජකාරීමය කටයුතු සඳහා උදවු ගැනීම නතර කලයුතුය.විප්ලවවලින් මේවා වෙනස් කල නොහැක!

අනුකරණය

මීට අවුරුදු දහයකට හෝ දොළහකට පමණ පෙර දකුණු පළාතේ  සිට පැමිණි මිනිසෙකු  අපේ ගමේ වසා දමා තිබුණු කඩ කාමරයක් කුලියට ගෙන  කුඩා වෙළඳසලක් හෙවත් කඩයක් ආරම්භ කළේය. අපේ නිවසේ සිට  මේ  කඩයට  කිලෝමීටරයක පමණ දුරක් තිබුන අතර ඒ අතරමැද තවත් වෙළඳසල් දෙකකි. ඉඳහිට පාන් ගෙඩියක් ගැනීමට  යන මා සැමවිටම  ළඟම ඇති කඩයෙන් එය මිලදී ගන්නා  බැවින් ඉහත කී වෙළඳ සලට යාමට අවශ්‍යතාවක් තිබුණේ  නැත. එක්  සෙනසුරාදාවක මදක් ප්‍රමාද වී පාන් ගැනීමට ගිය මට  මුල් වෙළඳසැල්  වල පාන් විකිණී අවසන්ව තිබීම නිසා මෙකී වෙළඳ සැල  වෙත යාමට සිදුවිය. අවාසනාවකට එහිද පාන් නොවූ නමුත්  වෙළෙන්දා හෙවත් කඩයේ මුදලාලි මා මවිතයට පත් කරවන වැඩක් කළේය.මට මද වේලාවක් එහි සිටින ලෙස පැවසූ  මුදලාලි ඔහුගේ පුතාව පා පැදියකින්  කොහේදෝ යැවීය.මිනිත්තු පහකින් හෝ දහයකින් පමණ මේ ළමයා වෙනත් කඩයකින් පාන් ගෙඩි දෙකක් රැගෙන පැමිණි අතර ඉන් එකක් මට ලැබුණි. තම කඩයට මුල් වරට පැමිණි පාරිභෝගිකයකු හිස් අතින් හරවා හැරීම නොකලයුතු බව ඔහු සිතුවා විය යුතුය.මයිකල් පොටර්  (Michael Porter )ගේ සිද්ධාන්ත නොකියව්වද  වෙළදාමට මොහු අති  ශූරයකු බව මට හැඟී ගියේය.
අවුරුද්දක් පමණ යනවිට මේ වෙළඳ සැල ඉතා දියුණු එකක් බවට පත්වුණු අතර මුදලාලිද ගමේ ප්‍රභූවරයෙකු බවට පත් විය. ඔහු අත ගැසූ වැඩක් සාර්ථකව ඉටුවන බව ඇදහු ගැමියෝ තම උත්සව වලදී ඔහු ප්‍රධාන ආරාධිතයා කර ගත්හ.
වසර කීපයක් ගතවුණු තැන කඩයේ දියුණුව දුටු  කඩ කාමරයේ හිමිකරු , මේ වෙළෙන්දාව ඉතැනින් ඉවත්කර එම ස්ථානයේ වෙළඳ සැලක් ආරම්භ කළේය. වෙළදාමට අවශ්‍ය මුලික දක්ෂතාවයද , ගම් වලදී  අවශ්‍යවන නයටදීම හා ණයකරුවන් අමනාප නොවන පරිදි එය අයකර ගැනීමට උවමනා  කරන නුවණ ද  නැති අලුත් වෙළෙන්දාගේ කඩය මාස හයක් පමණ යන්විටම බංකොලොත් වී ගියේය.

මා විශ්ව විද්‍යාලයේ ඉගෙන ගන්නා කාලයේදී , 255 ප්‍රධාන මාර්ගයේ බොල්ගොඩ පාලම පසුකල විටම , "ඇට  නැති මිදී" යනුවෙන් කාඩ්බෝර්ඩ් පුවරුවක් තබාගත් මිනිසෙකු මිදී වෙලදාම් කරන්නට පටන් ගත්තේය. දිනපතා එම ස්ථානය පසුකර බසයෙන් යන මම  මෝටර් රථ වල යන මහත්වරුන් මේ වෙළෙන්දාගෙන් මිදී මිලයට ගනු දකිමි.සති කීපයක් යනවිට වෙළෙන්දා දොඩම්ද, අඹ ද ,වෙනත් පලතුරුද විකුණන්නට පටන් ගත්තේය. මේ වෙළදාමේ ප්‍රගතිය දුටු සමහරුන් ඔහු අනුකරණය කරන්නට පටන් ගත අතර මාසයක් පමණ වන විට මග දෙපස පලතුරු කඩ වලින් වැසි ගීයේය. ඉල්ලුමට වඩා සැපයුම ඉතා ඉහල වුනු නිසා තවත් මාසයකින් පමණ පසු කිසිම වෙළෙන්දෙක් එහි නොමැති විය.

මට හිතෙන්නේ  ඉහත සිදදීන් දෙක අපගේ ශ්‍රී ලාංකීය සමාජය ගැන ඉතාම හොඳ ඉඟියක් ලබාදෙන බවයි. අදටත් බොහෝදෙනා බොහෝ දේ සිදුකරන්නේ තමන්ගේ උවමනාවට වඩා අනුකරණයක් වශයෙනි. හොඳ දේ අනුකරණය කිරීමෙන් හොඳක් සිදුවන නමුත් පුදුමය වන්නේ මේ අනුකරනයන් ඉතාම නරක දේවල් සඳහාද එකලෙස ක්‍රියාත්මක වීමය.

මීට අවුරුදු දෙකකට  පමණ පෙර මුළු ශරීරයේම ග්‍රීස් තවරා ගත් නිරුවත් මිනිසෙකු, රාත්‍රියේ නිවාස වලට පැමිණීම ගැන පුවතක් පලවිය.සති කීපයක් ගතවන විටම ලංකාවේ බොහෝ ප්‍රදේශ වලින් මේ ග්‍රීස් යකුන් පිළිබඳව  වාර්තා වුන අතර, රාත්‍රියේ වැඩ ඇරී  ගෙදර එන මිනිසුන් ග්‍රීස් යකුන් යි  වරදවා වටහාගෙන කල පහරදීම් පවා බහුලවිය.

අනුකරණය පිළිබඳව ජුගුප්සාජනකම සිද්ධිය මා  ඇසුවේ රත්නපුර කහවත්ත කොටකෙහෙන (හරියටම ගමේ නම මතක නැත) ප්‍රදේශයෙනි. අවුරුද්දකට පමණ පෙර අදාල ප්‍රදේශයේ සිටි ඉතා වයස්ගත කාන්තාවක , එක්  අමනයෙකු විසින් දුෂණය කර මරා දැමුණු අතර ඊ  ළඟ මාස තුන තුලදී රත්නපුරයේ එවැනි සිදුවීම් දහයක් පමණ සිදුවූන  අතර මිනිස්සු භීතියට පත්ව සිටියහ.

දැන් ලංකාවේ අලුත්ම අනුකරණ රැල්ල සියදිවි නසා ගැනීමය. පාසලේ විදුහල්පති බැනීම නිසාද, දෙමව්පියන් ජංගම දුරකථනය භාවිතා කරන්නට නොදුන් නිසාද , සපත්තු දෙකක් ගැනීමට සල්ලි නොමැති නිසාද වශයෙන් තරුණ පාසල් සිසු/සිසුවියන් දිවිනසා ගැනීම පටන් ගෙන තිබේ. සියල්ලෝම ඒ සඳහා සාරි පාවිචි කරති.
මේවා අසා අප හැඩිය යුතු දැයි මම නොදනිමි.නමුත් අදාල සිදුවීම්වල වගකීම එක් පාර්ශවයකට පමණක් බැර කල නොහැකි බව නම් සහතිකය.

නත්තල

ලොව පුරා වෙසෙන කිතුනු රටවල  කුඩා ළමයින්ට  නත්තල තරම් ප්‍රීති ජනක අවස්ථාවක්  තවත් නැත්තේය.නත්තලට  සති ගණනකට පෙරම තමන්ට  නත්තල් සීයා (father Christmas) ගෙන්  උවමනා කරන තෑග්ග  ළමයි ඉල්ලා  සිටිති. ළමයින්  හොඳට  හැසීරී හොඳ ළමයින්  උනොත්  නොවැරදීම  නත්තල් සීයා ගෙන්  තෑගී ලැබෙන බව  වැඩිහිටියෝ පවසති. ඉතින් අන් දිනවලට වඩා  නත්තල් කාලයේ  ළමයින් කීකරුය.

දෙසැම්බර් මාසයේ මුලදීම සරසා පිළියෙළ කරගන්නා නත්තල් ගස යට  නත්තල් සීයා තෑගි ගෙනවිත් තබන්නේ  නත්තලට පෙර දා  රාත්‍රියේදීය. තමන්ට තෑගි  රැගෙන පැමිණෙන  නත්තල් සීයාට කෑම පිණිස මින්ස් පයි  (mince pie ) සහ බීමද , නත්තල් සීයාගේ  කරත්තය අහසින් ඇදගෙන එන පිනි මුවන් (reindeer ) ගේ  කෑම සඳහා  කැරට් අලයක්ද  තැබිය යුතුය. චිමිනිය (Chimney ) දිගේ පැමිණෙන නත්තල් සීයා තෑගි තබා , කෑම  ස්වලපයක්ද අනුභව  කර යයි. ගෙදර  චිමිනියක්  නැත්නම් නත්තල් සීයා ඔහුගේ මැජික් යතුරෙන් දොර ඇරගෙනම  ඇතුලට  පැමිණේ.

උතුරු ද්රව්යේ  (north Pole ) සිට පැමිණෙන නත්තල් සීයාගේ ඇඳුම්ද ,වයසද , රූප සොභාවයද  හැමදෙනාම  දන්නේ  නත්තල්  සීයාගේ  පින්තුර නත්තලට මාස ගණනාවකට පෙරම කඩ සාප්පුවල දිස්වන නිසාය.

පරිගණක භාවිතය කුඩා ළමුන් අතරද  දැන්  ඉතා  ජනප්‍රිය නිසා , ගූගල්  (Google ) වෙබ් අඩවිය  මගින්  "සැන්ටා ට්‍රැකර්" නම් වෙබ් පිටුවක්ද , ඔවුන්ගේ  android ජංගම දුරකතන app එකක්ද  නත්තල වෙනුවෙන්ම  නිපදවා තිබුණි. ලොවපුරා ළමයින්ට තෑගි බෙදමින් යන  නත්තල් සීයා එක් එක්  රටවලට පැමිණෙන වෙලාවද , තෑගි බෙදන  ආකාරයද පෙන්නුම් කල "සැන්ටා ට්‍රැකර්"ට  අනුව  නත්තල් සීයා ලංකාවේ බදුල්ලද පැමිණ  තිබේ.

නත්තල් සීයා යනු වෙළඳ මෙවලමක් යයි ඇතැම් අය චෝදනා කලත් ළමයින්ගේ ලෝකය නත්තල් සීයා පිලිබඳ සොඳුරු මතකයන්ගෙන්  පිරී තිබේ.

ආගම ගැන කථා කරනවිට ලංකාවේ අප එය ප්‍රයෝගික ජීවිතයට යොදා ගන්නා ආකාරය ගැන සලකන්නේ   නැත. දහම්  පාසලේදී  පවා තේරුම නොදන්නා පාලි ගාථා කටපාඩම් කරවන අතර අපේ ආකාරයේ පන්ති කාමර අද්යාපනයක් තුලින් ආද්‍යත්මික ප්‍රබෝදයක් ඇති කලහැකියි  මා  සිතන්නේ  නැත.

ලංකාවේ කිතුණු සංගමය නත්තල් සීයාව  වෙලඳාම සඳහා  යොදා ගැනීම ශාන්ත නිකොලොස් මුනිවරයාට කරණ අපහාසය ලෙස දුටුවත් ලෝකයේ බහුතරය එසේ සිතන්නේත්  නැත. 

ඔබ සැමට සුබ නත්තලක් වේවා!

කුළු ගෙඩිය

කුළු ගෙඩිය

නිරුවත් උඩුකයෙන් යුතු මිනිසුන් දෙදෙනෙක් පොළොව මත තැබූ විශාල ඇනයකට මහා මිටි දෙකකින් මාරුවෙන් මාරුවට පහර දෙති.වැදෙන සෑම පහරක් පාසාම දැඩි හඩක් නගමින් ඇනය ටිකෙන් ටික පොළොවට ගිලාබසී.ටික වේලාවකට පසු මිනිසුන් දෙදෙනා ගිමන් හරින්නට පටන් ගන්නා අතර තවත් අයෙකු පැමිණ ඇනය ගලවා එහි කොඩි කණුවක් සිටුවයි.

මේ මහා මිටියට කියන්නේ "කුළු ගෙඩිය" කියායි කවුදෝ කියනු මට මතකය. කුළු ගෙඩිය!! මෙය නම් හරි පුදුම නමක් යැයි එවකට ඉතාම කුඩා එකෙකුව සිටි මට සිතුනි.

මට හදිසියේම කුළු ගෙඩිය සිහියට නැගුනේ පසු ගියදාක ලංකාවේ පුවත්පත් වල තිබුණු ප්‍රවෘතියක් දැකීමෙනි. හරකුන් මරණ තැනක් වටලා කෘර ලෙස සතුන් මැරූ ඝාතකයන් අත්අඩංගුවට ගත් පුවතකි එහි වුයේ.එයට අනුව මොවුන් හරකුන් මරන්නේ  උන්ගේ අත් පය ගැටගසා හිස පොඩිවී යන පරිදි කුළු ගෙඩියකින් පහර දීමෙනි.එකී ලිපිය කියවන්නෙකුට හැගෙන්නේ ඝාතකයන් ඉතා ම්ලේච්ඡ මිනිසුන් කොටසක් ලෙසටය.

සත්ව ප්‍රෝටීන වැඩිපුර ආහාරයට ගන්නා දියුණු යයි සැලකෙන රටවල පවා සතුන්ට සලකන ආකාරය මෙයට නොදෙවනිය.

යුරෝපයේ ආහාරයට ගන්නා බිත්තර වලින් හරි අඩකටම වඩා නිපදවන්නේ  "බැටරි හෙන්ස්" යනුවෙන් හදුන්වන  කිකිලියන්ගෙනි. මිනිස් ශ්‍රමය මිල අධික මේ රටවල බිත්තර නිෂ්පාදනයට අවශ්‍ය ශ්‍රමය අවම කිරීම සඳහා කිකිලියන්ව තබා ඇත්තේ උන්ට හැරෙන්නට නොහැකි ලෙස සැකසු කුඩා කූඩු තුලය. උන්ට ආහාර සැපයෙන්නේද, උන්ගේ අපදව්‍ය හා බිත්තර එකතු කරගන්නේද ස්වංක්‍රීයව ක්‍රියාත්මක වෙන "කන්වේයර් බෙල්ට්" මගිනි. කිකිලියන් කුඩුව තුල හැරුණොත් උන්ගේ බිත්තරද, කෑමද වැරදි කන්වේයර් පටියට යාම වලක්වීමටත්, කුඩා ඉඩක් තුල විශාල සතුන් ගණනක් තැබීමටත්ය උන්ගේ කුඩු කුඩා කර ඇත්තේ.

සත්ව හිංසනයට විරුද්ධව නැගෙන හඩට කන් දීමක් වශයෙන් පසුගිය වසරේ සිට යුරෝපා සංගමය කිකිලියන්ගේ කූඩු වල ප්‍රමාණය එක්තරා අගයකට වඩා කුඩා විය නොහැක කියා නීතියක් පවා පනවා ඇතත් එයින් වැඩි වෙනසක් වී නැතිබවයි වැඩි දෙනාගේ අදහස.

සුපර් මාර්කට් වල "ෆ්‍රී රේන්ජ්" එග්ස් හෙවත් නිදහසේ ඇවිදිය හැකි ලෙස තැනු කිකිලියන්ගේ බිත්තර හතරක මිලට "බැටරි හෙන්ස්" බිත්තර දුසිමක්ම ගතහැකි බැවින් බොහෝ පරිභෝගකයින්ද ඒ ගැන තැකීමක් නැත.

මස් සඳහා ඇතිකරන හරකුන් බැටළුවන් ආදී සතුන්ට නම් නිදහසේ ඇවිද උලා කෑහැකි තණ බිම් ඇති නිසා උන්ගේ ජීවන තත්වය කුකුලන්ට වඩා හොඳ අතර උන් මරණ්නට පාවිච්චි කරන්නේ "ස්ටනින්ග්(Stunning)" නමින් හැදින්වෙන සත්වයා සිහි නැතිකරවන ක්‍රම වේදයන්ය.මේ සඳහා විදුලියද, වායු වර්ගද ඇතැම් විට යොදා ගැනෙන බව කියන අතර බහුලව භාවිතා වන තවත් ස්ටනින්ග් ක්‍රමයක් වන්නේ විශේෂයෙන්  සැලසුම් කල උපකරණයකින් හිසට පහර දීමෙනි.මෙහිදී  මොළය විනාශ වී සතා ක්ෂණිකව සිහිනැතිවෙන බව කියනු ලැබේ.

මා වරක් පාසලේ පාපන්දු ක්‍රීඩා කරද්දී , ක්‍රිකට් පුහුණුවන්නන්ගේ ආරක්ෂක දැලට ඉහලින් පැමිණ පන්දුවක් හිසේ වැදී තප්පර කීපයකට මා ද "ස්ටන්" වූ අයුරු එය ඇසු විට මට සිහි විය.

යුරෝපා සංගමයේ මෙන් ලංකාවේත් සතුන්ගේ සුභ සාධනය සඳහා නීතී තිබෙනවාදැයි මම නොදනිමි.එසේ තිබුණත් ඒවා ක්‍රියාත්මක වන්නේත් නැත. බොහෝ දෙනෙක් මස් අනුභව කරන අතරම ලෝකයේ ඉතාම පිරිසිඳු බුදු දහම ඇත්තේ අපටයයි මහත් අභිමානයෙන් සිටින අප සතුන් මැරීමට මානුෂික ක්‍රම සෙවීමට තබා ඒ ගැන කතා කරන්නටවත් කැමති නැත.

මෙවන් පරිසරයක සිටින නුගත් , එහෙත් තම වෘත්තීය සතුන් මැරීම කර ගත්තෙකුට , සතාව මරා දැමීමට ඇති ඉහලම මානුෂික "ස්ටනින්ග්" ක්‍රමය උගේ දෙකකුල් බැඳ දමා හිසට "කුළු ගෙඩි" පහරක් දීම වන්නටත් පුළුවන.

ඒ නිසා මේ ම්ලේච්ඡයාව අල්ලා දැඩි දඩුවම් දියයුතුය කියා කෑ මොර දීමෙන් පමණක් කිසිවෙකුට වෙන යහපතක් නම් නැත!!

සුද්දී

සුද්දී

පසු කලෙකදී මා දැනගත් පරිදි අපගේ නිවසේ සිට කොළඹ ලෝක වෙළඳ මද්‍යස්ථානයේ රථ ගාල දක්වා ඇති දුර ප්‍රමාණය කිලෝ මීටර විසි හයකට වඩා ස්වල්පයක් අඩුය. කොළඹට එතරම් ලඟින් තිබුනත් මීට අවුරුදු විස්සකට තිහකට පෙර අපේ ගම ඇත්තටම පිටිසර ගමක් වැනිය. එවැනි ගැමි ගෙවල්වල පරිද්දෙන්ම අපේ ගෙදරත් මා කුඩා කාලයේ කිරි සඳහා එළදෙනක් සිටියාය.

ප්‍රුෂ්ටිමත්ව වැඩුණු ශරීරයක්ද, දුටුවන් බිය ගන්වන ආකාරයේ විශාල අං යුවලක්ද, තනි සුදු පාට හමක්ද තිබුණු නිසා අප ඇයට කීවේ සුද්දී කියාය.

ගෙදර එළකිරි තිබුණු නිසා දෝ කුඩා කල කිරි බීමට අපි එතරම් කැමැත්තක් නොදක්වීමු. මා වඩාත් කැමති වුයේ එයින් මීකිරි සදා ගෙන සීනි හෝ පැණි සමග කෑමටය.එළ හරකුන්ගේ කිරෙන් නිපදවන මීකිරි මීහරකුන්ගේ මීකිරි තරමටම දැඩි නොවුනත් මටනම් මේ දෙකම එක වගේය.

අපගේ දෛනික කිරි පරිබෝජනය ඉතා පහළ අගයක තිබුණු නිසා, සුද්දීගෙන් ලැබෙන කිරි වලින් වැඩි හරිය අපි ගම්වැසියන් සමග බෙදා ගතිමු.මේ නිසා උදැසනම කිරි ලබා ගැනීම සඳහා කිහිප දෙනෙක් අපේ ගෙදරට දිනපතා එති.

මේ අතර සිටි එක් අත්තම්මා කෙනෙක්ව කුඩා මට හොඳින්ම මතක, කිරි ලබාගත් විගසම ඇය එයින් උගුරු කිහිපයක් බොන නිසාය. අපේ අම්මා අපට එළකිරි දුන්නේ හොඳින් උණුකර නිවාගැනීමෙන් පසු නිසා උණු නොකර කිරි බීම එකල මා විමතියට පත් කල කරුණක් විය.

මට මතක හැටියට සුද්දිගේ අන්තිම පැටියා ලැබුණේ මට වයස අවුරුදු දහයක් හෝ දොළහක් පමණ වන කාලයේය. සුද්දී මෙන්ම තනි සුදු වූ පැටියාගේ හිසෙහි දුඹුරු පැහැති පුල්ලියක් තිබුණු නිසා මා ඌට කීවේ හඳයා කියාය.එයින් වසරක් පමණ යනතුරු මගේ හොඳම මිතුරා උනේ හඳයාය.

හඳයාගේ එක් ක්‍රීඩාවක් වුයේ උගේ හිසෙන් මා තල්ලුකර දැමීමය. ඌ කුඩා කල එය ඉතා විනෝදබර කටයුත්තක් උනත් දිනෙන් දින වැඩිවන උගේ කාය ශක්තිය සමග එය මටනම් ක්‍රීඩාවක් ලෙසට හැඟුණේ නැත.

 වයස අවුරුද්දක් පමණ වන විට අපේ පවුලේ හිතවතෙකුට ඌව දෙනා ලද බැවින් මා ඉන්පසු හඳයාව දැක්කේ නැත. නමුත් හඳයාව ගෙන යන අතරතුර ඌ මා සමග ක්‍රීඩා කල පරිදිම අපේ හිතවතාව තල්ලු කිරීමෙන් ඔහුව වෙලට ඇදවැටුණු කතාව අසා මා එකල හොඳටම හිනාවුන හැටි නම් තාමත් මතකය.

එයින් පසුව සුද්දී අපේ පවුලේ කෙනෙකු මෙන් වසර ගණනාවක් ජීවත් වුවාය. අපේ ගෙදර සුරතල් බල්ලෙක් නොවූ බැවින් වෙනත් ගෙවල්වල සුරතල් බල්ලට සමාන සැලකීමක් ඌට අපේ ගෙදර තිබුණි.

ගෙදර සිටින අවස්ථාවල සුද්දී තණකොළ ඇති තැනෙක ගැටගැසීම, ඌට වතුර සහ පුන්නකු දීම ආදිය මා ආසාවෙන් කල කාර්යයන් විය.

මට වයස අවුරුදු විසි ගණනක් වන තුරුම නිරෝගීව පසුවු ඇය එක් රාත්‍රියකදී හදිසියේම අතුරුදහන් වූවාය.

"සුද්දිගේ" වයස හැටියට ඇය නතර වන්නේ කොහිදැයි නිගමනය කිරීම අපහසු නොවන නිසා අපි ගව ඝාතනාගර වලට ගොස් සොයා බැලු නමුත් කිසිම සාධකයක් සොයා ගැනීමට අපොහොසත් වීමු.

ඉන් පසුව අපි ඇයව නොදුටුවෙමු .......