පාස්පෝට්

පාස්පෝට්

මට මේ සටහන් ලියන්නට හිතුනේ  "හෙන්ලේ ඇන්ඩ් පාට්නර්" නමැති උපදේශකසේවා  සපයන සමාගම මීට මාස දෙකකට පමණ වර්ගීකරණය කල ලෝකයේ හොඳම සහ නරකම පාස්පෝට් ලැයිස්තුව දුටු විටය.

එයට අනුව ශ්‍රී ලංකා ගමන් බලපත්‍රය යනු ලෝකයේ නරකම පාස්පෝට් නමයෙන් එකකි.

අපේ ගමන් බලපත්‍රය එතරම් පහත තැනක තැබීම ගැන අපට වෙනම විවේචනයක් ඇතත් ලාංකීය පාස්පෝට් එකක් දරා සිටීම නිසා විඳින්නට වෙන ගැහැට ගැන මම අත්දැකීමෙන්ම දනිමි.

මා මුලින්ම පිටරටකට ගියේ සති තුනක හෝ හතරක රැකියා පුහුණුවක් සඳහා මැලේසියාවටය. මා සේවය කල ඒ චීන සමාගමේ සේවය කලේ සේවකයන් කීප දෙනෙකු පමණක් බැවින් මගේ ප්‍රධානියා මා  සති හතරක් රටෙන් පිටවීම ගැන සතුටට පත්වුයේ නැත.එවකට ගුවන් යානයක ගමන් කර නොතිබුණු මම මේ ගමන ගැනමහත් ආසාවෙන් පසුඋනෙමි.

අවසානයේ මගේ ප්‍රධානියා එකගවුයේ  ටිකට් පතේ ආපසු පැමිණෙන දිනය විවුර්ථව තබාගෙන යන ලෙසටත් , ශ්‍රී ලංකා කාර්යාලයට මගේ සේවය අවශ්‍ය උනොත් පුහුණුව අතර මග නවතා වහාම ලංකාවට පැමිණෙන ලෙසටත් මා එකඟ කරවා ගෙනය.

මැලේසියානු ආගමන විගමන නිලධාරීන්ගෙන් මට සුහද පිළිගැනීමක් ලැබුණේ නැත.විවුර්ථ (unconfirmed) ටිකට් එකක් නිසා මා රටින් පිටවන දිනය ගැන ඔවුන්ට විශ්වාසයක් නැති බවත් වහාම ශ්‍රී ලන්කන් එයාර් ලයින් කවුන්ටරය වෙත ගොස්  ආපසු යන දිනය සහතික කරගෙන එන ලෙසත් ඔවුන් මට කීහ.

මෙය පැහැදිලිවම මගේ වරදකි. මම වහාම අදාල ස්ථානය සොයා ගියෙමි.

මගේ අවාසනාවට ශ්‍රී ලන්කන් එයාර් ලයින් කවුන්ටරය ඒ වන විටත් වසා අවසන්ය. එය විවුර්තව පවතින්නේ පැයක කාලයක් පමණක් බව එහි තොරතුරු කවුන්ටරයක සිටි කෙනෙක් මා සමග පැවසුහ.

ඉතින් මම ආපසු ආගමන විගමන නිලධාරීන් වෙත ගොස් ඒ බව සැලකර සිටියෙමි.

නිලධාරීහු ඔවුන්ගේ ඉහල නිළධාරිනියට මා ගැන වාර්තා කලහ.ඔවුන් කතා බස් කළේ මැලේසියානු  භාෂාව නමුත් මට වැටහුණේ ඇය මා රටට ඇතුල්වීම පිළිබඳව අකමැත්තක් නොමැති බවකි. අවසානයේ ඇය මගේ ගමන් බලපත්‍රය ගැන විමසා සිටියාය. "ආ.... ශ්‍රී ලන්කන් " ඇය මා වෙතට ආවාය. මම සිනහවකින් ඇයට සංග්‍රහ කලෙමි.

"ඔබ අර බංකුවේ හෙට මේ වෙලාව වෙනකන් නිදාගෙන ඉඳලා, ශ්‍රී ලන්කන් එයාර් ලයින් අය ආවහම ටිකට් එක කන්ෆර්ම් කරගෙන ආගමන  නිලධාරීන්ට ඒක පෙන්නන්න" ඇය මිත්‍රශීලී නොවූ හඬකින් පැවසුවාය. මා සිතුවේ ඇය විහිළු කරනවා කියා නමුත් ගමන් බලපත්‍රය එතන දමා ඇය යන්නට ගියාය.

කවුන්ටරයේ සිටි නිලධාරියා කීවේ ඇය කී පරිදි කරන ලෙසය

.මම බලවත් අසරණ බවකට පත් උනෙමි.

වටපිට බැලු මට "චීෆ් ඉමිග්රේෂන් ඔෆිසර්"  කියා සඳහන් කර තිබුණු අඳුරු වීදුරු සහිත කාමරයක් පෙනුණි. මම වහාම එහි ගොස් එහි සිටි ප්‍රධානියාට මට වුනු අපහසුතාව කීවෙමි. මගෙන් ප්‍රශ්න කීපයක් ඇසු ඔහුට මා වංචා කරුවෙකු නොවන බව වැටහෙන්නට ඇත. ඔහුම මගේ ගමන් බලපත්‍රයේ මුද්‍රාව තබා මට රටට ඇතුල් වීමට අවසර දුන්නේය.

තවත් වරක "hong kong" හි මා රඳවා ගැනුණේ මා චීනයට යන අතරතුර "hong kong" හරහා ගොස් නැති නමුත් ආපසු එන ගමනේදී එහි පැමිණීම ඔවුන් සැක කළ බැවිනි.එය මා "hong kong" පැමිණි පළමු වර බව ඇසුවිට ඔවුන් මා කාමරයක රඳවාගෙන පැයක් පමණ ප්‍රශ්ණ කලහ.

ඉන්පසුව මා එම රටවලට කීප වරක් ගියනමුත් කිසිම අපහසුතාවක් ඇති නොවීය. මගේ අදහසනම් ශ්‍රී ලාංකිකයෙකු මුල්වරට යනවිට අදාල රටවල් ආගමන නිලධාරීන් කිසියම් සැකයකින් ක්‍රියා කරන බවයි.

බොහෝ විට එයට හේතු වන්නට ඇත්තේ ඇතැම් ශ්‍රී ලාංකිකයන් අතීතයේදී කල නීති විරෝධී කටයුතු විය හැකිය.

කෙසේ නමුත් අපේ ගමන් බලපත්‍රයට පහත් තැනක් හිමිවීමට හේතුව ඉහත කරුණම නොවේ. ශ්‍රී ලංකා ආගමන විගමන දෙපාර්තුමේන්තුවේ ඇතැම් නිලධාරීන්ගේ අදුරදර්ශී ක්‍රියා ද මේසඳහා බෙහෙවින් බලපා තිබේ.

මගේ ගමන් බලපත්‍රයට තිබුනේ අවුරුදු පහක වලංගු කාලයකි. පාස්පෝර්ට් වල වලංගු කාලය කෙටි කෙරීම නිසා අදාල දෙපාර්තු මේන්තුවට වැඩි ආදායමක් උපයා ගැනීමට ඔවුන් කටයුතු කලාදැයි මම නොදනිමි.

නමුත් පැහැදිලිවම ඒ සඳහා සැලසුමක් නොවීය. මා ගමන් බලපත්‍රය දීර්ඝ කරන්නට ගියවිට  සිදු කල එකම දෙය නම් "වෙනස් කිරීම් සහ නිරීක්ෂණ" පිටුවේ

"වැලිඩිටි එක්ස්ටෙන්ඩර්ඩ් අන්ටිල්  <date> "  "මීට කොම්පිටන්ට් ඔතෝරිටි" කියා  සටහන් කර මගෙන් මුදලක් අය කර ගැනීමය.

පරණ ප්රින්ටරයකින් සලකුණු කල ඉහත වැකිය බොහෝ දෙනෙකුට නොපෙනෙන්නේය.ඉතින් ඔවුන් මගේ ගමන් බලපත අවලංගුවී ඇතැයි සිතති. ගමන් බලපත්‍රය පෙරල පෙරලා ඔවුන් යමක් සොයන අයුරු දකින මම "වැලිඩිටි එක්ස්ටෙන්ශන්" අහවල් පිටුවේයි කියමි.

 වරක් ජර්මනියේදී මගේ පිළිතුරෙන් නිලධාරියා සැහීමකට පත් වුයේ නැත.

කිසිම රටක ගමන් බලපත්‍රය ඉහත ආකාරයෙන් දීර්ඝ නොකරන බව කී ඔහු මා නිවසේදී ඉහත වැකිය ප්‍රින්ට් කර ගන්නට ඇතයි

මට චෝදනා කළේය.

මා එම රටින් පිටවන්නට සිටි නීසා  මා බියක් සැකක් නැතිව කියා සිටියේ , ලංකාවේ වැඩ කෙරෙන්නේ එසේ බවත්, අවශ්‍ය නම් ශ්‍රී ලංකා තානාපති කාර්යාලයට කතා කර ඒ බව පරීක්ෂා කර ගන්නා ලෙසත්ය.

අපේ ගමන් බලපත්‍රයේ මුල් පිටුවේ මෙසේ වැකියක් වෙයි.

"මෙය දරන්නාට අවහිර බාධාවලින් තොරව නිදහසේ ගමන්කිරීමට සහ අවශ්‍ය වන ආධාරද ආරක්ෂාවද සලස්වා දෙනා ලෙසටත් අදාල වගකීම් දරන සියලු දෙනාගෙන්ම ශ්‍රී ලංකා ප්‍රජාතාන්ත්‍රික සමාජවාදී ජනරජයේජනාධිපති ඉල්ලුම්කර ද අපේක්ෂාකර ද සිටී"

අපේ ගමන් බලපත ලෝකයට ප්‍රශ්නයක් වන ලෙස සැකසුම් කොට ඉහත වැකිය යෙදු පමණින් මුළු ලෝකයම එය හිස් මුදුනින් පිළිගනීවියි අදාල බලධාරීන් සිතනවාදැයි මම නොදනිමි!